அக்கா சுகன்யா என்னை விட இரண்டு வயது மூத்தவள் தான். இரண்டு பேரும் சகோதரிகள் என்று சொல்வதை விட எலியும் பூனையுமாக சண்டை போட்டுக் கொண்டு வீட்டை ரணகளம் ஆக்குபவர்கள். எங்களை சமாதானப்படுத்துவது தினமும் அம்மாவின் முக்கிய வேலையாக இருக்கும். அம்மா இல்லாத போது அதிரடி ஆக்சன் ஹீரோயின்களைப் போல் அடித்துக் கொண்டாலும் அம்மாவை கண்டு விட்டால் அழுது சீன் போட்டு என் மேல தப்பே இல்லைம்மா என்கிற ரேஞ்சுக்கு ஆஸ்கார் நாயகிகள் ஆக மாறி விடுவோம்.
குணத்தில் அக்காவுக்கு நான் நேர் எதிரி வெளியில் அவள் ரொம்பவே ரிசர்வ்ட் நான் வீட்டில் எப்படியோ அப்படித் தான் வெளியிலும். அக்கா பாடத்தில் சுட்டி நான் விளையாட்டில் ஆர்வம் கொண்டவள். அவளுக்கு தோழிகளே கிடையாது. அப்படியே இருந்தாலும் பள்ளியோடு நிறுத்திக் கொள்வாள். என்னைத் தேடி தோழிகள் தினமும் வீட்டிற்கு வந்து அரட்டை அடிப்பார்கள். விடுமுறை என்றால் என் வீட்டில் கூடுவோம் அல்லது தோழிகள் வீட்டிற்கு நான் சென்று விடுவேன்.
